Denis Kožljan (autorski radovi)

BABINA SINGERICA

nikad mi ni rekla kad je kupila
singericu samo su njoj oči
zasvitlile kad je sila poli danju,
vrgla je u mot i ušila sebi traveršu,
meni pupu ud starih krp,
oni put je makina za šiti zahukala,
zarompala pak je baba podmazala
i jopet zavogala, sve dok šiti ni finila,
svoju je singericu gladila
i kad je mirovala,
pokrivala da je prah ne takne,
da igla ne
ufalo zbode moj mali prst..
i tako lit i lit, čuvala je, šnjon se činila,
svakemu u selu ništo lipo ušila i niš za plaču
iskala,
samo je svaki mili put, svu sebe
u svoju singericu darovala….
………………———————————

singerica -šivaća mašina
sila-sjela
poli danju-uz nju
vrgla-stavila
u mot-u pogon
ušila-sašila
traveršu-kecelju
pupu-lutku
zarompala-zalupala
zavogala-s nogom pokrenula
finila-završila
pah-prašina
ufalo-nenamjerno
lit-godine
šnjon-s njom
se činila-pravila važna
iskala-tražila

VIOLICA NA COKU

najliplja,
kako kraljica
veča ud svih,
znala je resti
i kad su je prkidali,
rasprkidali,
njušili
i prez vode u
važu držali,
ni škucala,
srce je svitu
dopirala, kad
je grmilo
spod coka
se skrivala,
daždu je usta svoja
davala,
za dicu svoju
pensala,
vijolica,
sveto ime imala,
kolore babinega
pasa
ubračala,u vrime mraza
spod zemlje
se stiskala
ma kad
pramaliče
je zaplesalo,
vijola vijolica
piturala si je lase,
prefumon tilo
poškropila
i z mladiči
se maružala,
u ruke njin bižala,
u obraze bukivala,
pak na kraj dana
spod starega coka
ud gušta zaškrežala…..

ROSI

pomalo, lino,
rosi,
svako toliko,
srce drhti,
jagodice
plešu u svojen vrimenu,
čerišnje iščen
ma slabo ništo hi je,
a i tega jutra,
kaplje z boka,
pak
kako da ne umi,
gledan tamo priko boške,
more se diže,
mokri su crleni krovi
stare kiže,
a rosi, i jopet i jopet,
nikad kraja,
sunce zjapljen
laglje mi je na duši,
ne me sluša,
forši ne čuje,